中央力推「一帶一路」，香港政商界自然爭住配合。新民黨主席葉劉淑儀搶閘牽頭成立「海上絲綢之路協會」，噚日舉行成立典禮，請到中聯辦主任張曉明、港澳辦副主任周波等人主禮。
賀「海上絲綢之路」成立
呢個海上絲綢之路協會由葉劉拍住另一個行會成員陳智思一齊任聯席主席，名譽會長包括多個大孖沙，如信德集團董事總經理何超瓊、恒基兆業地產集團副主席李家傑等，連前政務司司長唐英年都有份，相信係想廣邀商界人士幫拖。
坊間有傳葉劉係想用呢個協助推動一帶一路國策嘅平台，爭吓阿爺歡心，為2017年選特首增加多啲籌碼，但佢嘅潛在對手、即係特首梁振英無懼勁敵來勢洶洶，噚日都有撐場到賀喎。
唔單只咁樣，梁振英喺成立典禮台上仲好鬼細心，笑住咁幫葉劉貼番佢嘅座位上，印有葉劉個名、但甩甩哋嘅貼紙，唔知咁樣係咪叫做先禮後兵？