國際大賽冇咗荷蘭，就好似飲茶冇得食蝦餃咁，總係好似爭咁啲嘢；周日歐國盃外圍賽A組生死戰，荷蘭作客竟然以0:3大敗畀土耳其，連第三位都俾土軍搶埋，好大機會自1984年後，緣盡歐國盃決賽周，到時荷蘭死忠叻哥就慘慘豬嘞。
白連特黑腳阿仔派膠
雖云上陣不離父子兵，不過白連特喺七月接手荷蘭國家隊後，佢個效力曼聯嘅囝囝戴利白蘭特幫唔到手不特止，仲派晒「膠」㖭。荷蘭喺開賽八分鐘已經失守，比錫達斯中場奧斯亞古普接應阿達杜倫嘅直線妙傳，射破荷蘭門將施利臣十指關。阿達杜倫轉投巴塞後一直冇得踢正式比賽，但唔代表佢冇狀態，喺26分鐘就逼到戴利白蘭特「甩腳」，之後引球推進再窄位射破施利臣，半場領先2:0。
荷蘭唔係冇名將，不過尹佩斯、史奈達已經走下坡，曼聯翼鋒迪比就浪射，成隊波攻不強、守不穩，到85分鐘主隊前鋒布拉卡爾馬斯埋齋，荷蘭輸到0:3，白連特領軍兩仗全敗兼且冇入球，真係好肉酸。
冰島、捷克齊入決賽周
明年法國主辦嘅歐國盃決賽周參賽隊伍增加至24隊，本來強國爆冷出局機會唔大，點知真係有可能發生喺荷蘭身上；荷蘭已經跌到去A組第四位，落後土耳其兩分，對賽成績更加輸埋，雖然土耳其最後兩輪要對捷克同冰島兩支前列分子，不過兩隊已經出線，話唔埋齊齊放搞到荷蘭出局。白連特賽後仲死撐唔辭職，前鋒尹佩斯就好坦白話：「球隊表現欠佳，出線已經好渺茫。」心水清嘅香港網民，就即時拎成日高調捧荷蘭嘅「阿叻」陳百祥出嚟抽水。
有人歡喜有人愁，同日捷克作客2:1贏拉脫維亞，冰島0:0悶和哈薩克，兩隊都確保頭兩名出線，尤其冰島更加係首次闖入大賽決賽周㖭。