呢排唔少零售商都話捱唔住貴租，中環人噚日就傳出，翠華茶餐廳（1314）喺中環有間分店都要執笠！唔知係咪收到風，翠華噚日傍晚自爆，開業17年、位於中環威靈頓街嘅分店，做埋本周五（11日）就唔做，不過唔係執笠，而係要裝修。
呢間開正喺鏞記對面嘅翠華，算係香港其中一間最出名嘅茶記，除咗唔少遊客光顧，或者中環友食晏外，由於舖頭係24小時營業，所以係好多蒲友落完蘭桂坊再去醫肚嘅好地方，𠵱家佢要裝修兩、三個月，蒲友都要搵過另一個地方覓食了。
周五辦「暫別派對」
翠華威靈頓街呢間8,200方呎嘅巨店，舊年底先至啱啱續租，月租達到230萬元，呎租280蚊，粗略除開一個月30日，每日要做到8萬元生意先至夠交租。家陣佢肯暫停營業2、3個月裝修，應該計到條數，重新開業可以賺番返嚟喇。
呢間翠華分店，本周五晚將會舉行「暫別派對」，仲會請客免費食下午茶，名額300個，周五上午11點半開始派籌。全日收入會捐去高錕慈善基金。