《前線．焦點2014》新聞攝影比賽噚日舉行頒獎禮，搵嚟食物及衞生局局長高永文同立法會主席曾鈺成做頒獎嘉賓。民望高表現一向平穩，除咗政改時同街坊辯論袋唔袋住先而爆seed，都冇乜經典容貌被攝記捕捉到，可能因為民望高好重視儀容。
佢話喎，呢個活動令佢醒起，自己都係攝記鏡頭下捕捉嘅人物，而佢出席立法會會議，都擔心俾人影到張睇緊電話呀、捽眼兼包雲吞嘅相㗎（可能嫌唔夠靚仔！）；最記得1997年香港首次出現禽流感，佢下午開記者招待會時被低炒，結果相中嘅佢滿面鬍鬚、個樣好唔開心喎（查實有啲滄桑感man啲，好過楚楚可憐啦！）
民望高認同一張好嘅新聞相可以好大影響，例如近期一張敍利亞3歲難民伏屍沙灘嘅相，就影響歐盟對難民嘅政策。