從未試過幫襯一間新餐廳，由入座到食甜品，侍應們都有各式各樣的蝦碌，最近有幸體驗到。
話說金朝陽（878）旗下銅鑼灣Midtown有幾間優質食肆，新近有間連續兩年獲選為《亞洲最佳50餐廳》之一的著名泰國餐廳Issaya Siamese Club，在此開分店，餐廳老闆係泰國名廚Ian Kittichai，食物質素一流，服務卻有廣闊的改善空間。
先是訂位，高C9明明早一天透過電話訂位食晏，去到竟然話無資料，不過有枱。入座後5分鐘無人放低餐牌、無人理會，好在之前讀過一篇文章，提到這間餐廳的侍應服務一般，心中有個底，見侍應們都是有禮，只是新手，總是一臉茫然，唯有一笑置之。
上第一道菜時，侍應妹妹戰戰兢兢放低招牌菜之一柚子蝦沙律（圖：花盤內放柚子），有隻蝦忽然跌在枱面，這位妹妹手快快將隻蝦用手執落隻碟。唉，此情此景，都無謂小題大做要求她換過另一碟，怕她連碟都打翻幾隻。
之後疑似經理熱情地推介一款泰式茶，誰知轉頭侍應哥哥過來指該款茶賣完，要換另一款。
最有趣是甜品時間，叫了賣相特別的「甜品寶盒」，裏面有多款小甜點，侍應姐姐介紹時說「呢款係朱古力嗰啲喇，跟住係cake喇，仲有黑加倫子做嘅，然後係……」平時聽侍應做介紹，通常講到天花龍鳳，法文、意大利文夾雜其中，這次省掉我不明扮明的功夫，都好。
這頓午餐人均消費約300元，食物質素的確相當好，尤其是一道香烤豬肋骨配自家制醬汁，肉質嫩滑，秘制汁香口，令人喜出望外，令人有意欲再光顧，希望下次去，侍應們已經訓練有素。