兩大澳洲猛將潘頓同柏寶，先後因傷退出開鑼日比賽，搞到賽事失色不少。
其中潘頓整親右足足踝，雖然佢開鑼日期間文裝於場內露面，右足亦未見包紮，但據知手尾都幾長，唔單止周三(9日)將繼續缺陣，短期內亦不會復出，就連幾時復課都未定。呢位前季冠軍騎師，預計本月17號再覆診一次，以確定傷勢最新情況，換句話說快極都要本月19號日馬先跑得，如果康復唔順利，甚至更遲先騎得。
反而策「好加加」試閘墮馬的潘頓鄉里柏寶，康復進展理想好多，雖然今天(7日)仍未見佢復課操馬，但柏寶照常入紙排位，參加周三谷草開鑼戰，甚至不用設後備騎師。按照馬會規例，柏寶仍須於周三賽前通過身體檢查，才可上陣。不過柏寶的座騎不多，只有「盈喜悅」、「幸運明星」、「皇帝誥令」及「根深柢固」四匹，前三駒出自蘇偉賢，「根深柢固」則是姚本輝旗下。
其中「幸運明星」上季一出即跑第二，利跑新鮮，最近由柏寶試嘉年華大閘，後上凌厲勝出，絕對是柏寶的開齋希望。