禮拜三快活谷開鑼戰，一如以往用A跑道，養草兩個多月後，預計場地會大利內檔及前置馬，因為睇番上季首次谷戰，亦係用A欄，當日十匹頭馬中，除了一匹「馬主光輝」留後勝出外，其餘九匹頭馬全部在入直路時，已守於前四名位置，其中「執子之手」、「金珀龍華」及「愛寶」都係守貼欄包廂位下建功。
另外，當日一檔馬交出兩冠五位，上名率高達七成，所以今期排內檔又具前速嘅馬，最值得優先留意，刻意留前鬥後外疊衝，注定冇運行。
今戰列陣馬中，第四場「領航精神」五次角逐谷草A欄獲兩勝兩位，排四檔對這匹均速馬有幫助，憑較佳場地性能可爭勝。另外，第六場「龍騰虎震」上季正是於谷草A欄開鑼戰贏馬，快馬配黃皓楠減十磅兼排一檔，有力重溫好夢。