真係人逢喜事精神爽，周日帶領中國女排捧完世界盃嘅總教練郎平，傳會喺明年一月再婚！中國女排星期日喺日本名古屋進行世界盃最後一場循環賽，結果贏東道主日本隊3:1，最終以總場數10勝1負，力壓塞爾維亞稱后，呢次亦係中國女排相隔12年後，再捧世界盃；教練郎平噚日帶住一班愛徒同世界盃凱旋，返回北京時受到熱烈歡迎，更有內地傳媒大爆郎平明年一月再婚，未婚夫係圈外人，係一位國家博物館嘅鑑寶專家，佢真喺識貨。被視為國寶嘅郎導，佢唔單止帶班中國女排帶到有聲有色，為人亦非常風趣友善。郎平今次完成捧世盃任務後，會着手籌備婚禮。12月將滿55歲嘅佢，87年同前國家手球隊隊員白帆結婚，92年生下女兒白浪，可惜二人喺95年離婚收場。