A股期指上周出現全球金融史上罕見一幕，三大期指，包括滬深300期指、上證50期指、中證500期指全部低水超過10%！以比例計，等於恒生指數期指低水超過2,000點，如果對期指稍微有認識，都知道係極為恐怖一件事。
點解內地期指可以咁誇張？一句講晒，因為A股現貨市場沽貨困難，又有T+1，而家又不准大股東減持，所以較少受行政干預的期指，才反映真實市場狀況。A股制度的缺陷，阿爺可以用行政手段包住，但在期指就要如實反映，堪稱照妖鏡。
期指照妖鏡呢種功能，其實一直存在。內地首個股指期貨，滬深300期指在2010年4月面世，其後滬綜指兩個月內跌咗25%。至於上證50期指、中證500期指到今年4月才推出，結果A股同樣大跌。
呢次股災以來，內地股民最大呼籲，就係關閉股指期貨，其實等於諱疾忌醫，有病發燒，卻責怪個溫度計。中證監上周旗下的中金所終於出招回應，本周起期指客戶每日交易超過10手，將被視為異常交易，即可能被封賬戶。
以滬深300期指計，一點等於300元（人民幣．下同），以現時3000點水平計，一張（一手）期指合約金額90萬元，中金所又將按金比例提高到40%，即一張合約36萬元。每日最多買賣10張，即成交金額最多360萬元，大戶再難搵食。
不過，成交萎縮，亦都令買家更難入市，低水情況亦難改善。期指最大功能係預先發現價值，長期維持大低水，對A股絕對係不祥之兆。
黃尹華