社區變身藝廊？民政事務局主辦、康文署藝術推廣辦事處籌劃嘅「悠遊藝術大樓」公共藝術計劃，邀請本地藝術家喺公共空間創作藝術品，好似到大角嘴市政大廈，除咗打波或游水，亦可坐吓楊悅欣創作嘅紅凳。
名為《立立雜雜大角嘴》嘅作品係一根六角柱，六道牆掛滿舊物件如二手鎖匙等，仲有冰室等相片同手繪插畫；每道牆都代表區內唔同特色，例如街坊小店、舊樓住宅，展出嘅都係區內常見但又會隨時日消失嘅嘢。楊悅欣特別喺現場放置那些年常見嘅小紅凳放大版，畀大家坐低慢慢回味。
洞穴創意工作室則為東涌市政大樓設計作品《有空》，喺露天樓梯擺設方凳，提醒市民善用公共空間。鄧國騫嘅作品《這裏有船》就以航海為題，喺赤柱市政大樓內擺放船上日用品、尋寶地圖同魚網等，營造置身海洋嘅感覺。展覽即日起至明年7月舉行，設有導賞團同工作坊，詳情可以瀏覽藝術推廣辦事處網頁。