韋達對上兩季做唔到冠軍騎師，13屆冠軍王朝告一段落，不過佢不斷捕捉機會打爭氣波，呢日可算吐氣揚眉，皆因佢頭馬陸續有來，繼第四場勝出時廐「正藍旗」後，第六場四班千四米，再贏高伯新馬房之「金龍」，兩駒咁啱均3.7倍，個人以一對大熱門包辦孖寶，做今季開鑼戰主角。
「金龍」由高伯新訓練，上季出道屢拼不逞，今季重新於1400米起步，呢場夥拍韋達半條直路後上如入無人之境，馬主北京富豪趙勇之前曾斥資900萬購入「北京金寶」，創香港拍賣馬歷年最高價，不過該駒未上陣便出局，前季佢再於本地拍賣會入貨「金龍」，結果今季終於幫佢首次在港贏馬。不過趙勇沒有到場，因為他身處北京，由他的女兒代拉頭馬。
其實呢場如果唔係十三少韋達殺得性起，女見習生蔣嘉琦已經可以首日上陣即贏，呢場佢騎半冷門方廐「會心微笑」冇再如第五場「尊皇速龍」般漏閘，「會心微笑」沿途貼欄狂放，直路中段以為可帶到，到拉士百幾米至畀「金龍」追過屈居亞軍，可謂功虧一簣。三、四名分別係「真慷慨」及「超群名駒」，四重彩19,688元。三T中獎有人中，十蚊派近一千四百萬。