【中環】
胡定欣去年同舊愛闊少沈柏淳（Patt）分手後，今年身邊已出現新歡音樂人Terry（陳明道），之前有傳兩人蜜遊新加坡打得火熱；因為偷食被胡定欣狠撇嘅有米Patt亦不愁寂寞，前日傍晚6點幾，佢同一位短髮女現身中環歌賦街嘅agnès b. Cafè LPG，兩人坐喺門口位悠閒地飲嘢傾偈。
新歡宣示主權
短髮女嘅髮型同健康膚色，咁啱同胡定欣當年拍劇集《衝上雲霄》嘅look有啲相似，唔知Patt係咪對定欣念念不忘，還是對呢類型女仔情有獨鍾？其實當年Patt同定欣拍拖，有傳Patt偷食斷正後向定欣求婚箍煲，兩人去到談婚論嫁階段，可惜最後都係分手收場。
着住白色情侶裝嘅Patt同短髮女，嘆完tea後漫步睇沿途嘅店舖，仲入咗一間傢俬店睇咕𠱸，之後兩人行去九如坊食拉麵，其間Patt全程不停發言，表情多多似乎同短髮女有傾唔完嘅話題，食飽再漫步行上必列者士街，其間齊齊煙癮大發邊行邊煲煙，之後就去Oolaa酒吧餐廳撐枱腳，唔夠半日就嘆足三餐。
後日係胡定欣嘅34歲生日，噚日就係新歡Terry嘅47歲牛一，Terry喺社交網晒生日蛋糕相，蛋糕寫住：「MY T,HAPPY BIRTHDAY」，呢句「MY T（Terry）」既甜蜜又宣示主權，唔知係咪定欣送畀男友嘅生日蛋糕呢！
採訪、攝影：朱志聰、梁繼光、畢紹基
