香港零售業水浸眼眉，藥房、金行同化妝品行業未到傳統旺季就話步入寒冬。本港上月訪港旅客跌8.4%至492萬人次，內地客減近一成，日、韓、台旅客都比去年同期下跌。一切點只因為反水貨客活動問題。
睇睇周邊國家旅客入境數字，今年5月被新沙士影響，訪韓旅客下滑，今年首七個月佔整體旅客最多嘅中國客，按年跌六成；港、台、日旅客分別跌半成至八成。韓國取消新沙士警戒後立即推出遊客購物全線九折優惠外，主要航空公司大韓、韓亞及濟洲航空同機場快綫合作，成人搭車劃一收小童價，單程減至6,900韓圜，比本地購物優惠實際得多。
日本今年首七個月則受惠日圓弱勢，中國旅客有270萬人次，較去年同期多近倍。過去一年每百日圓兌人民幣由約「5.1算」升見「5.3算」； 揸人仔去日本購物更划算，所以中國客去日本掃貨豪氣未改，平均每名中國客花費28.5萬日圓購物，近萬八蚊港紙，遠遠拋離其他旅客平均用17萬日圓。報道話藥妝等零售業人手短缺，有工冇人做。有位中國留學生喺訪問話「見到中國人失控咁買，我感到羞愧！」篇報道仲講日本媒體將中國旅客瘋狂購物形容「爆買」（爆買い），又統計今年首七個月日媒使用呢個字嘅次數有967篇。
C+B
本欄逢周一刊出