恒隆（101）公關大員、助理董事關則輝，跑咗馬拉松10幾年，出名好跑得，亦係孝順仔一名。噚日尊賢會搞咗一長一幼嘅3公里街馬，關則輝帶埋88歲嘅媽咪齊齊「出戰」。對於一班「老友記」嚟講，喺成30幾度嘅悶熱天氣下，行3公里唔係咁容易。
不過，關媽媽平日有周圍行下、做下伸展運動，所以難唔到佢。「初頭媽咪話有少少緊張，唔知得唔得」，關則輝又話，今次係第一次帶媽咪參賽，最開心係全程同媽咪拖住手一齊行。
咁又係呀，以前細個就要拖住媽咪出街，但大大下，呢啲咁親密嘅親子活動，真係好少機會做到。關則輝笑言，細個就媽咪拖住手教佢，仲鼓勵佢跑步做運動。「媽咪好少出嚟中環，沿途我就介紹呢度係邊度」。𠵱家就輪到佢「教」返媽咪，短短50分鐘嘅路程，兩個人共享一段溫馨時光。