9月3日早晚上演兩場大龍鳳，閱兵及世界盃外圍賽，都係習近平主政後所吹出的「中國夢」主旋律。9月3日閱兵日子早早訂下，唔知點解咁巧合同時又踢世界盃，夾都冇咁準，由早到晚全國人民集體亢奮，朝早就展示軍力，夜晚就想以一場足球大勝做ending，預告會至少贏三球，做強國人多幸福，沉醉在強國崛起夢中。
明眼人都睇得出大閱兵是習近平個人show，揚刀立威，宣示中國乃朕之天下，同乜嘢抗日反法西斯無關，純屬「借啲意」搵個堂而皇之理由。閱兵有其特別之政治意味，尤其是隊冧兩大軍頭徐才厚、郭伯雄後，習近平要向國內外顯示軍隊仍然絕對效忠，而對內地人而言，閱兵影像會將國家抽象概念實體化，令個體融入國家集體之中，最經典作品是納粹女導演蘭妮執導的《意志的勝利──紐倫堡閱兵》，她拍攝方式一直沿用至今。至於足球，比閱兵更深入民心，球場上旗幟飄揚，歌聲此起彼落，入球時球員激動及振奮動作，通通經過剪接融入旁白，變成民族主義宣傳片直播全國。
反映國家軟實力未夠
習近平提出中國夢，以民族復興為主題，強兵富國當然是例牌菜，但佢中國夢加入了另一特別項目：足球。大家一直誤以為因習近平係球迷，所以先至特別關心國足，錯晒！國足係中國夢戰略部署一部份。2014年2月27日中央全面深化改革領導小組第十次會議上，由習近平主持審議《中國足球改革發展總體方案》，會議强調「實現中華民族偉大復興的中國夢與中國體育強國夢息息相關」。之後交由政治局委員劉延東掌大旗。2015年1月26日國務院正式通過《中國足球改革發展總體方案》，定出短中長目標，包括短期管理體制改革、中期達到亞洲前列水平，長期目標是2030年打入世界盃及奧運決賽周，可見國足表現已提升至國家面子工程前列。
香港悶和國足，猶如一個波餅省中習近平，如此精心部署要令全國人民由頭high到尾，點知俾一棚「有層次」、「有黑人、白人、華人」組成嘅雜牌軍無端破壞，充滿港產片外賣仔打贏黑帶主將味道，亦令人想起少林足球對魔鬼隊。內地群眾痛罵國足總在大日子「贈興」，但我反而同情班球員。守門員王大雷賽後表示球員想在反法西斯勝利70周年大日子中以勝利向國家獻禮，對球員造成一定壓力。大家眼見上半場久攻不下，下半場就亂晒龍，冇心做波，一味斬入禁區，香港隊防守易過借火，教練佩連在場邊黑口黑面，賽後甚至忍唔住口嘲諷似「細路仔足球」。其實香港隊防守甩漏甚多，國足無法取勝，是咎由自取，講到尾都係期望太大壓力沉重。
足球同閱兵最唔同，係要見真章，有對賽球隊，有國際標準；冇得自吹自擂自high，坦白講，解放軍新型主戰坦克有幾勁，鬼知咩？但足球就冇得吹，日本有本田圭佑、岡崎慎司、吉田麻也，南韓有孫興慜、奇誠庸等球星效力國際頂級聯賽。國足球員亞洲一線都未到，在國內雖然身價超高，但全屬泡沫，放洋就多做後備。
足球水平係國家軟實力反映，既要集體團隊精神，又要有球星個人創造力，再加上時機，缺一不可。中國由熱情球迷鄧小平開始，主動吸收先進經驗，當年便有健力寶少年隊往巴西學法，但國足至今仍然在二流水平。三十年前在北京，香港戰勝國足，鄧小平是觀眾之一；三十年後，香港足球雖已風光不再，我們仍然希望11月主場打敗國足，等大家知道，真正強國並非靠硬實力，飛機大炮，以強權當真理，而係有良好的制度、規矩、文明、再加上技術嘅軟實力。
添馬男