亞視雖然今年6月宣佈有新投資者注資，但事隔兩個多月，員工每個月仍被拖糧，令員工士氣極度低落。據本報了解，原來亞視一姐朱慧珊亦感到意興闌珊，今個月約滿亞視後決定不再續約，令亞視藝員又再買少見少。
播映期一拖再拖
據了解，朱慧珊今次選擇離開，除因為多位舊同事相繼離職外，傳聞與新節目《開門見珊》有關；該節目本為朱慧珊度身訂做，內容圍繞時事及社會熱話，但有傳新投資者未肯投放資源，而且節目原定上月初推出，結果播映期一改再改，至今仍未決定何時推出；加上構思該節目的王祖藍舅父冼偉智，以及該節目總監葉成昌及多位幕後先後離職，節目骨幹幾乎「走清光」，令到朱慧珊感冇癮決定離開亞視，《開門見珊》最終變成「意興闌珊」！
記者前晚向朱慧珊求證，她透過WhatsApp承認：「我和亞視的合約這個月就完結。可以講現在已經是自由身了。」記者指她孭飛的《開門見珊》還未「開門」便離開，朱慧珊說：「冇辦法啦，時間配合唔到。其實新老闆和管理層都同我談過，希望我可以留下兼做幕後的工作。但我這段時間想休息一下，暫時不想做任何工作。這是我個人的決定，與亞視冇關。我十分感謝新的投資者司老闆（司榮彬），因為他提出希望我能出任一個管理層的職務，雖然暫時未能合作，但對於他的邀請，是很感謝。」
蔡國威嘆好可惜
《開門見珊》將由朱慧珊另外兩位拍檔蔡國威和楊正軍孭飛，對於朱慧珊離開亞視，蔡國威昨回應：「如果係嘅話梗係好可惜，因為珊姐係亞視icon。呢個節目係為珊姐而設，冇咗佢好似冇咗個靈魂人物，節目名都可能有改動，我哋印咗嘅T恤、Apps，好多嘢有呢個名，如果要改動，所有嘢都要改，都係一個損失。」
採訪：魯吉