呂方一連兩場嘅紅館騷，前晚圓滿結束，嘉賓同第一場一樣，都係阿姐汪明荃同徐小鳳，老友杜德偉就捧足2晚場，小鳳姐仲當正自己主場一樣，台上talk足近廿方鐘，似足個人棟篤笑騷。
呂方台上大讚阿姐好靚，喺佢眼中係女神，阿姐就話:「點解成日都唔見你喺香港唱歌，淨係喺內地搵真銀，內地就啱啱流行你呢種唔高大嘅人，睇吓王祖藍就知，佢月入千萬，o依家仲買成億豪宅。」呂方就笑話:「我唔使啦，300呎就夠。」阿姐話:「你點可以咁樣㗎。」呂方:「好好，咁我買大啲，但樓底唔使咁高。」呂方又大讚阿姐敬業樂業，不停彩排，阿姐笑同呂方唔係好啱KEY，講緊係聲線唔夾，呂方話:「得㗎啦，合唱歌我會就你。」
小鳳姐出場頭一Part同首晚講嘅嘢差不多，佢話聽到倫永亮台上形容呂方係頻臨絕種動物，就大笑話:「其實可以拎去配種嘛，相信你哋實在太熟，佢先用動物形容你。」小鳳姐俾呂方大讚係國寶級就話:「嘩，我唔要呀，你當我係熊貓咩，其實我真係好支持你，波點衫都着出嚟。」
之後觀眾以為小鳳姐合唱完走人，報以熱烈歡呼聲，小鳳姐話:「你哋想我唱多幾十首歌係咪呀?。」小鳳話自己好認真，又話彩排好似整容咁，會上癮，就自爆之前去咗韓國，仲好招積咁問大家:「睇我有乜唔同到?放心我冇乜唔同，諗住去行街冇人識，包到中東人咁，但側邊嘅人同我講千祈唔好，『維修』過嘅人先會咁包，我初初見到啲人以為受傷，淨係包隻眼，覺得佢哋呢方面真係好先進，雖然唔知是苦是甜，咁包住係好有勇氣，自己就唔敢，驚整到阿媽都唔認得。」
講吓講吓，小鳳姐已經講咗超過廿分鐘就話:「我都係唔好阻住大家。」但又繼續對住頭排有個男觀眾講:「點解你着短褲又戙高隻腳，你下次要好似杜德偉咁着番條長褲，我都係唔好講咁多嘢。」呂方話:「唔緊要，我可以係側邊休息吓。」小鳳姐就唱咗幾句山歌送畀觀眾，最後演唱會去到約晚上11點30分完場。
騷後訪問呂方，問佢會否開part 2，佢話睇吓有冇機會，問到頭場有觀眾講DoDo鄭裕玲，佢扮發火，問係咪好介意，呂方呢晚就話:「點會，唔介意，都咁多年，觀眾喺台下叫，對答講多啲嘢，去美加登台都慣咗。」然後又再次多謝兩位阿姐做嘉賓。