特首梁振英對港人嘅言行時有批評，下屆特首熱門之選嘅財爺曾俊華卻大讚港人質素高。財爺噚日喺網誌提及上月29號先到港大出席高桌晚宴，同300名新生見面，大讚在場同學提出嘅問題質素、英語水平、表達能力都好優秀，令佢對港大另眼相看。
欣賞港人高質素
之後佢趕去會展撐曹星如，話現場觀眾好克制，冇粗言穢語或挑釁說話及行為，台上台下都展現出港人高質素一面，佢笑指有網友提議佢用洪拳同Rex嘅西洋拳打番場係虐老，自爆約40年前年輕時曾經參加自由搏擊比賽，身上仲有當年參賽時受傷嘅疤痕㗎。
若然要講香港威水史，不得不提香港足球代表隊近日喺世界盃外圍賽奮勇抗戰中國隊，守住和波不失。鬍鬚曾亦大讚門將葉鴻輝表現神勇，不負「英雄輝」之名，佢祝願港隊稍後喺旺角場迎戰強隊卡塔爾，再次同現場球迷向世界展示香港人優秀嘅質素同風格。