「球王」美斯不嬲都俾人揶揄淨識喺球會發威，返到國家隊就啞晒火，上個月輸咗美洲國家盃後，甚至有傳佢會退出國家隊。對於呢啲抨擊，美斯講過：「失去美洲盃後有人想殺死我，但佢哋永遠都唔會做到。」喺上周五晚嘅國際足球友誼賽，佢後備落場10分鐘就梅開二度，帶領阿根廷7:0狂數玻利維亞，兼打破退隊傳言。
入埋呢兩球，美斯仲成為史上首位喺每支南美洲國家隊身上都取得入球嘅阿根廷球員！不過，美斯踢國家隊一向都喺冇咁重要嘅賽事龍咁威，去到大賽即刻失晒魂，一眾阿根廷粉絲睇嚟唔好咁老定住。
《FIFA》數值勁過C朗
美斯上周五晚嘅表現絕對冇得彈，而啱啱公佈嘅電玩遊戲《FIFA 2016》球員綜合能力值，佢亦以94分，一分之差力壓死敵基斯坦奴朗拿度（C朗），成為全個遊戲最高數值嘅球員，直頭好事成雙！咦，C朗喺啱啱對法國場友賽完全冇表現，唔通遊戲開發商連呢場波都計埋？