【男潮籽：紳士裝修】
「如果謝賢唔着得咁誇張，我反而覺得佢幾型。」70歲的劉永明（Dave）接着道：「我哋呢個年紀，有好多嘢要收埋，頸同手臂最易突顯老態，贅肉同肚腩一定要遮住。」他不是日本設計師山本耀司，但素來穿衣有道，不靠美源髮采搭救，也不依賴名牌時裝來點綴，只以健康身軀及不羈的心行走江湖，魅力自然流露。你或會覺得他「老而嚟癲」，身邊友人卻認為他「老而彌IN」，連媳婦也稱讚他比丈夫還有型。最近，德國一位104歲的潮伯伯熱爆網絡，朋友把他們相提並論，潮人形象原來早已深種。若然有人喚他作「阿伯」，他倒有些介意，如果是「潮伯」，他則會照單全收，「潮伯我又鍾意喎。」
「着衫唔一定要追名牌，着得好睇有型就得，係件衫襯我，唔係我去襯衫。」他舉例，穿背心會露出拜拜肉，容易暴露老態，老人家要着得有型，就要懂得藏拙，「謝賢經常露臂，贅肉同皺紋都出晒嚟，感覺上同佢身形好唔襯。」他又提醒「老朋友」要適量健身，肌肉結實便可，不應過份，「年輕嗰陣健身會有肌肉，但到某個年紀就變成贅肉，一唔做就馬上皺皮。」Dave當初也做gym，後來害怕肌肉太發達而停止，改做其他運動，現在的他既沒皺皮也沒贅肉，露臂背心放心照穿，「着衫當然係將最fit最好嗰一面展示出嚟，冇理由將皺皮嗰一面畀人睇。」
藏拙之外，也可佩戴飾物，尤其是帽子跟眼鏡，「雖然有時覺得戴眼鏡好扮嘢，但對老人家嚟講好重要，特別係有老花，太陽眼鏡可阻隔紫外線。」現在他的造型大多離不開眼鏡，訪問當日也帶來了好幾副，「我一直有戴太陽眼鏡，一半係扮嘢一半為咗保護對眼，我嘅老花至今都冇加深。」常見飾物還有帽子，Dave說年紀大頭髮稀疏，帽子夏可遮陽冬可保暖，「如果你揀啱一頂帽，起碼年輕五至十歲。」拍攝當日他運來一箱衣服，猜想家中應該不少吧，「如果每日換一套夏天衫，兩個月應該綽綽有餘。我每年買嘅衫唔係特別多，只係我身形冇乜點變，即使十年前嘅衫𠵱家都着得，冇舊冇爛咪一直着囉。」記者如夢初醒，想起當年買下的28吋腰牛仔褲，已像青春般一去不回了。
最緊要自信 壓腿冇難度
看到年邁老人，社會一律尊稱為X伯，但人們見到他卻不叫劉伯，而是Dave。年屆七十的他，一點也不覺老，「心境年輕，冇乜老態，又點會覺得老呢？」他說年紀大仍要保持童心、好奇心，自然會有動力，「當然要有自信，如果冇自信，戴帽戴眼鏡都會覺得唔自然，又點會畀到人fit嘅感覺呢？」他以104歲的德國潮伯為例，「佢着得好斯文，乾淨企理，神完氣足，睇起嚟好有魅力。如果我可以好似佢咁樣，大概再冇遺憾。」
生得標致或是恩賜，但穿得有型則是後天努力，「身形好重要，如果全身贅肉又有肚腩，着乜都唔會好睇。」為貪靚而keep fit，Dave多年來一直堅持做運動，現在每日早晚各步行拉筋一小時，風雨不改。拉筋拉得多，竟然還可一字馬，當日雖然身穿緊身牛仔褲也小試牛刀即場壓腿，結果腳舉得比頭還高，令記者汗顏。周末他亦會踩單車來回大埔及馬鞍山，一年也會到外國深潛兩次，大馬印尼澳洲菲律賓統統去過，「喺潛水界，我估我係最大年紀嗰個。」
儲錢買靚牛 放工換西裝
眼見Dave穿着新潮，猜想讀書時期必定十分貪靚，他卻搖搖頭說當年的校服是恤衫白褲，尋常得很。雖覺老土，但校風嚴謹他只得循規蹈矩。然而，老土校服並無埋沒愛美的心，工作後開始買自己喜歡的衣服，「嗰時一直好注重形象，覺得要着得乾淨企理。」有時他西裝骨骨，有時則像不羈浪子，年輕時受西方文化影響，James Dean及Alain Delon等男神演員均是其偶像，喜歡穿爛牛加皮褸，髮型則是貓王的大騎樓，一副不羈形象油然而生。
「爛牛係受外國電影影響，我試過用個幾月嘅人工嚟買一條來佬牛仔褲。」六十年代，他一個月薪水約$120，當時來說已很不錯，喜歡不羈造型的他，為一條$150的Lee牛仔褲而動心，「嗰時物資短缺，進口貨零舍貴，我儲咗好耐先買到嗰條褲，結果着咗十幾年。」肉赤背後是長情，懂得珍而重之，與時下的fast fashion絕對背道而馳。年輕時，他曾從事裝修行業，平日工作身水身汗，不想穿得邋遢的他竟然每天帶兩套衣服返工，一套是開工衫、一套是收工衫，「唔係話做裝修就要着得唔企理，每天收工我都會換番套西裝、梳靚頭髮先走。」他笑言，當年在業內算是有「最佳造型」的美譽。
年輕時心態狂野，隨着年紀漸大，到四十多歲時，Dave那瀟灑的騎樓髮型也逐漸變為較成熟的賭神裝，周潤發那種，一直至今。髮型有變，原來他的穿着也有平實之時，「60歲嗰陣，孫仔出世，我做咗爺爺，心理上覺得要收斂啲，唔想穿得太誇張，冇理由阿爺級數都仲穿成咁啩。」那幾年，他一直穿得斯文，所買衣服也較平實，都是白色恤衫黑色西褲，如今重返年輕時的不羈路線，是因為5年前參加了信義會的長者課程。
無懼粉色褲 自信行Catwalk
「返學之後社交多咗，同學之間嘅穿着會互相影響，見到人哋着得好睇，大家都會放膽着。尤其為銀髮一族嘅時裝品牌Smart E擔任model之後，自信心都增強咗，原來一把年紀都可着得時髦。」於是穿衣風格再度改變，變回原本那個型格的他。粉紅色褲也沒猶豫，印有比堅尼美女圖案的T-shirt也照穿不誤，身邊朋友也受他影響，現在Dave不僅沒有包袱，擺pose行catwalk均信心十足。
對比六、七十年代，Dave表示社會現在對老人的看法不同，「以前大家都覺得老人應該着得平實啲，唔好太花巧。如果當時嘅人好似我咁着，一定會惹嚟好多奇異眼光，覺得你係異類，幾十歲仲扮到成隻雀咁。」他說時下的人接受能力較高，不僅沒有異樣目光，有時甚至得到讚賞。
中外潮伯
本地銀髮時尚
記者：劉東佩
攝影：劉永發
編輯：陳國棟
美術：孔文彬