型男聚首，不談美女不談酒，竟然講小朋友！眼前的3位型男，古天樂、余文樂及張孝全各具特質，型格、粗獷、靚仔各擅勝場，他們的共通點是都已屆適婚年齡，娶妻生子成為他們的另一人生大事。難得的是他們都喜歡小朋友，但在跟小朋友合作拍電影這項艱巨任務上，各自不同經歷，有喜有哀有不捨。連一向言簡意賅的古天樂，在小朋友的話題上變得滔滔不絕。
撰文：黃曉妍
古仔：教仔唔好貪
現年44歲、一向公認喜歡小朋友的古天樂，認為跟小朋友相處是一種緣份，他說：「我拍過好多戲都遇過唔少小朋友，小朋友喺現場會認定某個工作人員係壞人，我問佢點解會覺得嗰個係壞人，佢話：『我覺得佢個樣好壞』，咁就真係冇符。」旁邊的余文樂即笑問古仔，有否被小朋友當過壞人人辦時，古仔笑說：「咪就係覺得我好人，呢個就係緣份，有時佢唔鍾意你都冇辦法，好似《怪獸公司》有個主角得一隻眼，會有小朋友唔驚，仲覺得好可愛㖭。」
獲邀去生日會
一直以來跟動物及小朋友合作，在電影圈被視為兩大難題，近日跟5個小孩合作的古仔記憶猶新：「我拍《五個小孩的校長》係最深刻，由100個揀剩5個，好痛苦，大家friend咗會唔捨得，呢個係最深刻，所以到𠵱家都仲有聯絡，生日會叫我去生日會。」
對於自己的下一代，古仔說：「未發生嘅事我唔知喎，不過唔擔心就冇可能，但唔好過份、唔好貪，見到好多家長逼小朋友學呢樣學嗰樣，係想小朋友好，但係適可而止，最重要係同小朋友溝通到、玩得埋、傾得埋，願意同佢哋去溝通，唔好怕煩，小朋友天真起上嚟可以冇原因，有時一定要呢樣要嗰樣，所以要去了解。」
髮型：Dan @ Pi4
化妝：Carmen Man
孝全：想有下一代
31歲的台灣型男張孝全自爆很鍾意小朋友，他說：「有跟小朋友合作過，我喜歡小朋友，我覺得《淚王子》那次合作得很開心，因為他們都不是演員，是導演從學校找出來，所以他們都很真實、很單純、很可愛。但我有碰過已經拍過好多戲的小朋友，他們好懂事，他們可能是國小，但感覺他們是十幾歲，反而覺得不是很可愛。」
讓小孩去選擇
在3人合拍的電影《迷城》中，導演林嶺東指「社會越貪，人就越冇希望！」那麼會否影響到日後有下一代的想法？孝全說：「不會影響到我，我想有（下一代），但是我現在沒有，如果我有小孩的話，我應該盡量在前半的時間不會讓他在城市，到比較鄉下一點的地方，簡單一點點，雖然科技很發達，但不管怎樣，想盡量簡單，等大一點由他自己去選擇。」
髮型：Stone Cheng (Salon Amarone)
服裝：Stone Island
場地：Mira Hotel
樂仔：早熟未必好
至於33歲的余文樂對小孩採開放態度，他說：「有冇耐性對佢哋好緊要，有朋友天生唔鍾意小朋友，阿彭（導演彭浩翔）咪唔鍾意小朋友，因為佢覺得自己係小朋友，佢好清晰呢樣嘢，冇所謂嘅，最緊要兩公婆有共識，先天對住小朋友會𤷪𤺧，你就已經弊傢伙，我就好鍾意小朋友，扭計就一定有，個個都扭，我又唔係太抗拒。」
簡單就是快樂
樂仔說：「我反而唔鼓勵小朋友拍戲，我覺得太早熟，如果我係家長，我唔會希望係咁，會缺乏應有嘅童真。有時太早熟都未必係好事，之前拍一部戲，有個小朋友好聰明，佢直頭可以提我對白，會feel到佢好老積，我覺得小朋友簡單啲會開心啲。」
樂仔笑謂有沒有下一代這件事，十劃都未有一撇，但他直言將來不會加重小孩學習的負擔，他說：「我哋細個都冇學琴棋詩畫，我覺得性格緊要過技能。」
髮型：Ben Yeung (Hair Corner)
化妝：Jenny Tziong
