【本報訊】警長被誣告毀壞證物，他力證指尖要以21磅力，才可拗斷指頭大小的記憶卡；14歲少年被7人車撞至重傷，反被指不小心橫過馬路，他計算事發時車速，推測意外涉超速駕駛，義助少年獲撤銷控罪。找他做專家證人，九成勝訴，「專家唔一定高高在上，我都係小市民出身」。初中沒畢業，一家八口逼住板間房，苦讀夜校工專，花了30年考專業試，由行船到大學講師，他是即將退休的理大機械工程系工程師盧覺強。
記者：呂麗嬋
離開工作了40年的校園，理大8月底為他舉行餞別宴，筵開8席。專程到來送別的，除了同事，還有十多名因為他洗脫罪名的苦主。「好多謝盧Sir，唔係佢，我可能坐緊監」。眾人七嘴八舌，坐在一旁的盧覺強一面靦腆：「好唔捨得，好在學校話會提供平台同實驗室，等我同市民見面，繼續為法庭撰寫專家報告」。他還認真到印全新的名片，附上自己電郵，歡迎市民找他幫忙，繼續做冤情大使。
「多謝太太肯同我捱」
66歲的盧Sir本身讀機械工程，自15歲開始，他也如一個停不下來的馬達，「中二就輟學，第一份工喺太古船塢做信差，之後學師」。連行步路都快過人，只因要追回失去的時間。長達8年半工讀，馬達運轉達最高速，「朝八晚五船塢返工，晚七晚九喺北角官立小學讀工專，見中間有個空檔，五點半去皇仁讀英專學英文」。
22歲學滿師做師傅仔，被派去建築師樓，「有冷氣嘆」是當年師傅仔的成功指標，但他鼓起勇氣走出「舒適區」，應徵做遠洋輪船「大車」，長駐船艙監測遠洋輪機械運作，「行船好處係時間好規律，冇乜娛樂，最適合刨書」。別人帶唱機、罐頭上船，他帶大箱參考書，備戰專業試。「讀書冇捷徑，我成日同我啲學生都係咁講」。
1975年，理工學院招聘副講師，時年25，剛結婚，初戀對象是母親工友的女兒，「多謝佢肯同我一齊捱」。別人大學畢業即考專業試，他從後狂追，48歲先考齊英美及本地工程師牌。至於成為冤情大使，那是人生的下半場，但有粒種子，卻一早種下，「嗰時仲喺船塢學師，用全副身家買咗架老爺車，駛到英皇道，交通燈轉黃，後面架小巴冇煞車，從後撞上，仲鬧我點解停車」。
助黃仁龍打贏官司
尋常交通意外，沒人做證，有冤無路訴，「架車撞爛晒，仲要捱罵」。小事一樁，他記在心中。「我同自己講，如果有機會，一定要用自己嘅知識幫有需要嘅人」。1994年機會出現，一名商人懷疑不知情下購入劣質油渣，導致廠房柴油機故障，「當時香港剛引入無鉛汽油，無綫訪問我，嗰廠家知我有研究，透過律師樓搵我做專家證人」。當年的大狀，正是前律政司司長黃仁龍。案件在高院審3日，盧覺強一方勝訴，苦主獲巨額賠償。
深入淺出的專家報告，打出響亮名堂，上門找他幫忙的小市民絡繹不絕，「好多專家大學畢業就留喺大學教書，我學師出身，條路好迂迴，從無忘記過小市民係點樣生活」，矢志為民請命的他說。