梁特率領一個300人代表團上京睇閱兵，當中包括不少傳媒老總。做記者做到升為總編輯之後，就有些少特權，可以貴賓身份獲邀參加不少大型典禮、活動，與極高官位官員，甚至國家領導人一齊出席宴會盛典，至於參加後會否咁易受到統戰，抱相公厚我之心，明示或暗示屬下編輯、記者對主人家/主辦當局客氣啲，多講正面，少揭負面新聞，則非吾所知也。講番轉頭，廿幾年前左丁山係傳媒頭頭之時，也曾獲邀到台北參加過雙十節閱兵及晚上嘅國賓酒會，去完就冇乜感覺，只係領略到在台灣的中華民國冇乜國際友人捧場，氣氛淡薄而已。「國際友人」紛紛捨台北而就北京，正是西瓜靠大邊，今天中國大陸聲威日隆，因人口相差太遠，直情有資格有銀両提出併購台灣嘅要約（假設係兩間公司嘅話），局勢有如鄭成功據台對抗大清皇朝，若以史為鑑，台灣前途都幾難太樂觀，何況台灣政壇無能人，國民黨民進黨兩黨領導人之中，目前睇唔到有邊位係叻嘅，無論邊個執政，也難有氣魄與視野帶領台灣走出政治經濟困局。
在中環碰到一位老友，與上京300人相比，佢應該係有資格參加閱兵嘅，但未受邀請，於是問佢：「梁特同你唔啱㗎？」老友連忙解釋：「唔好亂講，我冇資格同特首講啱或唔啱，不過唔請我仲好，睇閱兵咁辛苦，要在室外近五個小時，人又多，我已年過六十，五小時內恐怕要去廁所三次，睇閱兵嘅話，要着埋老人紙尿片至得。喺屋企睇電視直播閱兵，舒服得多咯！」左丁山聽到，為之啞然失笑，老友並無誇張，佢嘅圈子內傳聞，去年董先生率領一眾大富豪上京見習近平聽2017年政改提案之時，大家坐在人民大會堂內聽訓示及發言，一位年紀大啲嘅大富豪就忍唔住提出要去洗手間，結果要由一位上京方知官小嘅香港政壇紅人攙扶大富豪來回。今次300人名單中，去年上京嘅大富豪冇乜幾個，算梁特醒目啦。
任何一個國家舉行盛大閱兵，目的只有一個，就係宣揚國威，顯示軍隊實力與最新武器。俾邊個睇？昔日蘇聯就係特登俾美國歐洲睇嘅，今日中國就係要俾美國日本睇，但以今時今日之間諜衞星拍攝科技，相信美日早已知道中國軍力之八八九九，今勻做大騷係撫慰民族主義者之自卑心態啫。