。足球唔係政治，政治令生活複雜，足球幫妳生活化繁為簡。
。足球唔係睇戲，冇人可以保證妳心目中嘅主角有個完美大團圓結局。
。足球唔係打拳，唔係計點數，如果唔係中國41次射門就唔使咁無奈。
。足球唔係打排球，冇得嗌暫停，冇得一唔掂就望住教練，自己的波自己踢。
。足球唔係打乒乓，乒乓一定要分勝負，波可以打和，仲有種特殊心理狀態叫做和波當贏。
。足球唔係打機，雖然好多阿媽話兩樣都係冇前途。
。足球唔係打仗，唔係鬥多坦克同戰機就一定贏。
。足球唔係娛樂，唔包妳一定happy，仲隨時有傷心靈。
。足球唔係選港姐，冇問答環節，但身體語言話妳知邊個人頭邊個豬腦，唔使講嘢。
。足球唔係養寵物，尊重嘅就叫一聲對手，唔好嗌人做狗。
。足球唔係霸權大晒，弱旅贏一場可以開心一年，強隊嘅開心只維持一日。
。足球唔係新興潮品，而係日用品，鍾意睇波唔會有人話妳好型，但妳心靈唔會成日囉囉孿。
。足球唔係名牌子，唔需要季季換款，揀定一隊，夠妳撐一世。
。足球唔係擴張仇恨，而係撐自己人。
。足球唔係一定要入波，因為入波唔一定贏，但唔失波一定唔會輸。
。足球唔係只在乎贏，輸嘅時候仲留低先係真球迷，同識男朋友一樣。
。足球唔係一定要講粗口，其實可以好斯文，除非對手鬧人先。
。足球唔係東方之珠，但都可令香港人自豪。
。足球唔係隊隊波都可以做friend，但妳總會搵到同路嘅香港人。
KEYMAN
節目主持
電郵：mailto:[email protected]