德國上年拎完世盃後，唔知係興奮得滯定衰輕敵，之後成日失準，包括歐國盃外圍賽輸畀波蘭。好彩喺上周五歐國外D組榜首大戰，德國返主場再鬥波蘭做番齣好戲，3:1擊敗對手重上榜首；先開紀錄嘅湯馬士梅拿同梅開二度嘅馬里奧葛斯，加埋為波蘭破蛋嘅羅拔利雲度夫斯基，咁啱全部都係拜仁慕尼黑球員。
梅拿葛斯技壓羅拔仔
其實歐國外都已踏入尾聲，德國出線仲未有絕對優勢，對呢支三屆冠軍嚟講都算失威。佢哋上周五喺法蘭克福主場出擊，阿仙奴中場奧斯爾能夠趕及復出，攻力更加平均。不過，呢場波焦點就落晒拜仁球員度，12分鐘湯馬士梅拿接應左閘祖拿斯赫達助攻先開紀錄；德國對住熟路嘅波蘭，唔再好似首循環咁失威，全場控球指數達66%，射門亦有21次，喺世界盃決賽射入黃金入球嘅前鋒馬里奧葛斯就最「弗」，19分鐘連過兩關建功，領先至2:0，加埋下半場門前執雞，幫德軍贏3:1，賽後七戰得16分，以兩分反壓波蘭升上D組榜首。教練路維賽後就話：「整體嚟講我對球員表現滿意，長傳亦做得好；不過，後防失誤亦引起失波，下場對蘇格蘭要保持集中力。」德國下場歐國外會喺周一作客蘇格蘭，贏埋嘅話就踩多半隻腳入決賽周囉。
蘇格蘭輸波危危乎
波蘭今場都有安慰獎，拜仁前鋒羅拔利雲度夫斯基射入今屆外圍賽第八球，繼續排射手榜榜首；更開心莫過於睇住同組亦步亦趨嘅蘇格蘭作客0:1爆冷輸畀格魯吉亞，仲俾4:0輕取直布羅陀嘅愛爾蘭搶埋第三位㖭。波蘭𠵱家梗係希望德國幫手，周一繼續威作客擊敗蘇格蘭。
