經常來港開騷的美國樂隊Maroon 5，相隔3年前晚又再於香港亞洲博覽館舉行演唱會，但仍吸引到不少香港名人明星捧場，其中容祖兒及劉浩龍（師兄）更拍拖睇騷，他們找來徐濠縈及其女兒陳康堤擋駕，「祖師」更睇得十分投入不停跳舞，完騷後還自拍大合照！
觀眾嗌回水
Maroon 5於暖場嘉賓演出完後，準時於9時開騷，全場9成滿，除了吸引容祖兒、師兄、徐濠縈及康堤捧場外，連何家千金何超蓮及「宇宙巨星」鄧紫棋（G.E.M.）都結伴到場睇騷。未開騷前記者發現祖兒及師兄均戴帽現身場館中，最初二人站開一段距離，更拒絕拍合照，直至記者叫祖兒跟阿徐拍照時，祖兒跟師兄等一行6人才一起拍照，之後直奔控制台位置睇騷。
轉以新髮型示人的Maroon 5主音Adam Levine，一開始已獻唱熱爆新歌《Animals》幫歌迷熱身，連祖兒及師兄都不停擺動身體，Adam更索性脫掉外套，剩下背心演唱，整個演出Adam都以歌會友，較少說話，直至演唱半小時後唱完《Love Somebody》才開始跟港迷打招呼：「香港你們好，我們是Maroon 5！」
Adam除晒結他技藝外，又solo演唱，並鼓動全場大合唱，祖兒跟師兄雖然刻意分開企，但亦跳得很開心不時「咬耳仔」。至於同樣身處控制台範圍內的超蓮跟G.E.M.，整晚同樣睇到手舞足蹈。
安哥時，Maroon 5唱出大熱歌曲《Moves Like Jagger》及《Sugar》，「祖師」熱情不減，跳得更勁，還跟阿徐等大班朋友齊齊自拍大合照。Maroon 5最後於10時半完騷，但有歌迷卻嗌演出太短要求回水。
採訪：盧葦
攝影：陳俊強
