【飲食籽：識飲惜食】
i世代，乜都要high-tech！就連街市也不例外。於上月尾開幕、由領展斥資2,500萬元翻新的小西灣街市改名為「本灣街市」，除分為「街市」及「水產」兩大區，還加設幾項「估你唔到」新科技裝置，務求街坊買得easy，使得開心。不過「high-tech嘢」是否易用又得人心呢？即管請來閒時愛買餸煮飯，兼成日周圍搵食的食家盧覓雪（Michelle），親身落去走一轉，實試買餸新體驗。
唔啱包換 40分鐘內送到
「Yeah，終於嚟到喇！」踏入本灣街市大門，沿左直行到尾，便來到Michelle最期待的i-Chicken攤檔，皆因這裏有全港首創的視像揀雞服務，「有香港少爺雞、龍崗雞、嘉美雞，想蒸定煲湯？」頭戴咪架的阿燕既是夥計，又是「揀雞直播大會」主持，她會先問顧客心水雞款、重量及煮法，然後透過視像與柴灣街市的海記雞檔直接對話。「我想蒸，咁要嘉美雞，兩斤左右。」Michelle說罷，阿燕隨即聯絡柴灣的拍檔，「阿星阿星，幫我揀隻嘉美雞，兩斤左右！」檔口兩部大電視更會直播柴灣實況，一部播雞檔環境，另一部則播「候選雞」的近鏡英姿，「唔啱心水，可以轉另一隻㗎！」阿燕笑說。揀好雞及付款後，雞檔會立即劏雞，包妥兼放入保溫袋，速遞專員便於40分鐘內將雞直送至i-Chicken檔口。Michelle問：「要你哋逐隻送咪好貴？咁啱有十隻八隻就話，但𠵱家得我買，係咪我特殊先送過嚟咋？送貨錢會唔會轉嫁番去我身上？」相信這也是一眾慳家師奶擔心的問題。i-Chicken方面解釋，新服務是專門為該區長者而設，雞價與於柴灣雞檔購買相同。因兩檔距離不遠，就算只有一單生意也會送，保證能於40分鐘左右將雞送至小西灣。
處女初生蛋 盧覓雪︰未見過
「哇，連雞蛋都咁多款。」另一樣吸引Michelle的，是鋪滿大電視下的一籮籮雞蛋，大小不一，有白有啡，來自不同國家，如巴基斯坦、泰國、美國，亦有本地蛋等。她對其中一款「初生雞蛋」極感興趣，「之唔係處女雞第一次生嘅蛋囉，好有營養！竹絲雞蛋都少見，個殼青青哋，但蛋黃蛋白同普通蛋一樣。」阿燕介紹說。而本地農場出品的音樂蛋，在普通屋邨街市也很少見。
柴灣送雞一條龍
Step 1︰
收到顧客要求後，柴灣「海記雞檔」店員會按指示揀取「候選雞」展示於視像鏡頭前，同時提供重量及價錢。
Step 2︰
顧客以視像觀察雞的狀況，不滿意可作更換，選好及付款後會即劏。
Step 3︰
速遞專員將劏好的雞放入保溫袋，再乘巴士或小巴由柴灣到本灣街市。
Step 4︰
約40分鐘，速遞專員便將雞送到i-Chicken檔口，憑單據認領。如顧客未到，店員會將雞放入雪櫃冷藏。
讚：有廣角鏡有近鏡，可清楚觀察雞的狀況，不用「吹籮柚」揀雞，較衞生。加上承諾約40分鐘送到，符合師奶習慣，先揀雞，買餸，再取雞，夠方便。
彈：可設公眾收音咪，讓顧客直接與柴灣雞檔溝通，減輕夥計工作。另外，柴灣店員舉起雞時，會緊捉牠的翅膀，可考慮只拿腳，讓牠更生猛，更多肢體動作。
Michelle點睇：整體幾方便
八達通買餸 最啱潔癖人
「我好怕找番嚟嘅銀仔又濕又有魚鱗！」Michelle每逢逛街市也會帶濕紙巾。對於八達通付款設施，她非常歡迎。不過她發現有肉檔仍以現金找贖，建議街市全面實施八達通付款。
讚：毋須找贖零錢，乾淨又方便。
彈：部份檔口仍設有現金找贖，應全面實施八達通付款。
㩒機買熱情果 盧覓雪︰係咪玩嘢？
I Fruit與自助售賣機相似，按下號碼並付款後，水果會由升降盤送至出口。「你係咪玩嘢，熱情果咁酸即買點食？」她認為㩒機買的水果應能即買即食，清洗、去皮等工序也要減少。
讚：24小時運作非常方便，適合單身人士及健康上班族。
彈：即買即食型水果，熱情果非首選，應加設蘋果、香蕉等較大路的款式。
讚：
輪椅BB車行街市 冇難度
「一路行好多BB車及坐輪椅嘅人，唔使人幫都嚟到。行動不便嘅人都可以行番街市，係我最開心嘅事。」
新舊合璧街市feel 師奶最buy
「好似魚檔咁，將魚分好晒一碟碟，呢種傳統擺檔方式，師奶最鍾意！」
彈：
欠單身貴族最愛 懶人餸菜包
「點解唔做嗰啲一包包嘅餸菜包，呢區唔只得家庭，我都識好多單身人士住呢頭，你知我幾擔心單身人士㗎啦，哈哈！」
地濕易跣親 店舖種類少
「雖然水產區呢度鋪咗啲冇咁跣嘅磚，始終有細路及老人家，地下有水會影響安全。新街市係極摩登，對舊社區嚟講太花巧，而且我未滿足，好似雜貨店得一檔，魚檔得三個，其實可以再多啲選擇。」
記者：謝翠玲、黃依情、黃子卓
攝影：鄧鴻欣、伍慶泉、潘志恆
編輯：李寶筠
美術：吳子豪