噚日係一年一度公務員優質服務獎勵計劃頒獎禮，消防處成大贏家，而警隊喺公眾形象獎攞到亞軍。特首梁振英喺典禮致辭，佢話做行會召集人時，經常親自申請各種政府服務，又讚政府部門服務優質，雖然公務員工作繁忙，但得到家人支持同諒解，仲叫在場傳媒幫手，「將我心底嘅訊息，傳畀佢哋家人」。不過頒獎禮完咗，佢眼尾都冇望過記者一眼就走人，在場記者唔知點反應！
義工教少數族裔學中文
講番今年頒獎，消防處成大贏家，獲得3.5個金獎，警隊就輸個馬鼻得3個金獎，其中油尖警區憑「寶石計劃」獲隊伍獎（專門服務）金獎。警隊喺公眾形象獎屈居亞軍，油尖警區署理指揮官蕭傑雄被問到滿唔滿意，佢就話樂見警隊獲獎，社會唔同界別人士對警隊有唔同觀點，希望將來更上一層樓。
寶石計劃約有50名警察義工參加，向16至25歲有意投考公務員嘅少數族裔教授中文。喺香港土生土長嘅巴基斯坦人簡能係受惠者之一，佢自幼夢想成為警員，但因中文水平低，中學畢業後參加寶石計劃，去年3月終考到警察，佢話父母親友都感自豪。