一位朋友以電郵傳來新世界發展嘅尖沙嘴星光大道海濱擴建計劃，秘書打印出來，要二十幾張A3紙，真浪費公司紙張，邊度有時間與心機細心閱讀吖，即刻打電話問呢位朋友Y：「喂，你搞邊科？」朋友Y話：「想知道你有乜意見呀？反對定贊成？」
個人嚟講，真係事不關己，作為一個香港市民呢，就覺得延伸、擴建、美化星光海旁大道，對香港係一件好事，最好係可以搞到由尖沙嘴碼頭起，行海濱大道一直行到去紅磡火車站，沿途係純行人道，邊行邊睇維港海景。呢啲事，本係政府工作，但因為歷史遺留落嚟嘅問題，呢條海濱大道最人流旺，最有商業價值嘅地段（即1960年代之藍煙囪、由太古集團擁有，後來賣晒俾新世界，造就咗新世界成為大地產／酒店公司），一直由私人企業做業主，故此以往搞星光大道，由新世界負責，一啲都唔奇。
呢次擴建有爭議之處係康文署冇公開招標，就話與新世界商討簽20年合約，由新世界負責數以億元計嘅建築費，二十年內如有任何盈餘，須交回政府，虧損就由新世界食晒。照咁睇，政府有贏冇輸，佔盡便宜，納稅人睇唔到有乜理由去反對。
現在有人提出司法覆核（JR），指康文署冇公開招標，違反公私營合作慣例，JR就JR啦，反正香港人人有如此自由，由法庭判決更可一錘定音。但如果真係為硬原則而公開投標嘅話，左丁山幾懷疑有冇地產商肯落標。投資幾億銀，毫無盈利嘅項目，你估地產商係慈善團體咩，更何況，美化擴建星光大道，得益者除咗市民與遊客之外，有實利嘅係邊個？咪係新世界發展與洲際酒店囉，帶旺人流，唔益酒店與新「新世界中心」，會益邊個？信和與嘉里兩大集團係尖東大業主，點會肯出錢嚟明益新世界？太古、長實、新鴻基地產、恒基，在尖東尖西都冇大利益，更加唔會制，九龍倉攬住廣東道已經印印腳，做乜要在星光大道搞無償項目？左睇右睇，新世界坐定粒六，冇人同佢爭做呢項計劃嘅。新世界肯斥資幾億銀明益政府，當然唔係做善事，而係有collateral benefit，蝕呢度，希望改建新落成嘅新世界中心可以賺番啫。作為市民與納稅人，呢條數計得過，如果由政府出幾億銀美化新世界海旁，結果同樣又係用公幣明益新世界！市民到時仲可以講，點解唔將嗰幾億銀為全港學校加裝濾水器，避免鉛水，嘉惠下一代學子？
特區政府事先唔搞場明知結果嘅諮詢騷，宣佈後又腳軟話拖住諮詢吓先，此乃梁振英政府之特色，連大梁粉都激氣兼無癮。