就喺噚日，八方寫過新聞統籌專員馮煒光、民建聯陳克勤同經民聯梁美芬睇閱兵上fb打卡好高興，搞到網民話佢哋違反國家法規翻牆，估唔到連自由黨榮譽主席田北俊同佢馬仔田毛毛都抽水，話要向克勤仔學嘢。陳克勤又真係喺fb教路，叫人用中國移動中港數據共用計劃，咁唔使翻牆都可以用到fb。不過又有網民話佢咁公開教路，萬一北京要維穩封埋呢條路，咁就真係累街坊。
話說田少睇完建制派突破內地防火牆上fb貼相後，佢都照貼番幾張相，不過田少就話佢係由fb專頁管理員田毛毛幫佢貼，仲話要問定陳克勤，點樣可以喺京城上fb度po相，明顯係抽盡克勤仔水！
公開講隨時累街坊
唔知係咪怕俾人話違反國家法規翻牆，克勤仔後來再喺fb貼文，話佢用中國移動嘅中港數據共用計劃，就可以喺京城上fb，又強調自己唔係幫中國移動賣廣告，而係「回應」點解佢可以喺大陸上fb唔使翻牆。之後仲有網民喺克勤仔fb留言，解釋中國移動嘅4G計劃有5GB中港共用數據，內地上網唔收漫遊價。
不過有網民即刻話，其實返內地做嘢，又或成日返內地玩嘅人，一早知呢樣嘢，但冇人會好似克勤仔咁打鑼打鼓講，亦有喺內地做嘢嘅人同八方講，呢排內地網絡維穩越打越大力，連提供翻牆嘅VPN公司都封殺，「咁公開話用中港數據卡可上fb，容乜易令北京連呢條路都封埋！到時佢真係累街坊！」
李八方
mailto:[email protected]