【維基退場】還有20日，港視自家製節目便徹底清倉。去年11月19日港視開台，還未及慶祝一周年台慶，主席王維基已宣佈不再開拍劇集。曾跟港視一起奮戰的艾威，悲嘆一個勵志故事，竟是失敗收場。曾効力港視的王宗堯和陳詩慧，為港視倒數感到悲哀與無奈，憶起當日港視因為「一男子」因素不獲發牌，二人更當場激動落淚。
撰文：魯吉
由《選戰》開始，走到《開腦儆探》結束，王維基苦心經營的香港電視網絡（HKTV），因為收視及廣告收入不似預期，為免日日燒銀紙，只好壯士斷臂，在本月24日播映完最後一集《開腦儆探》後，港視製作的17套自家製劇集將全部播完，之後只會滾筒式重播舊有節目及外購劇維持網購生意營運，並於日內陸續將《選戰》和《Night Shift》等劇集及節目放上YouTube，讓世界各地網民免費欣賞。
冚熄希望火花
港視進入命運倒數，曾跟港視一起並肩作戰的艾威，曾滿腔熱血希望為香港電視史發動一場革命，但隨着「一男子」因素令港視失落免費電視牌照，早已令艾威由天堂跌落地獄。艾威感慨說：「中間起起跌跌，到流動電視牌都俾人截住嗰陣，都覺得冇乜希望。港視開台呢10個月雖然達成自己心願，入行30幾年終於可以做到第一線，好似有少少火花，但好快冚熄咗！好難形容我𠵱家心情，我覺得個天同我開玩笑！我唔知𠵱家算唔算係全軍覆沒，只可以講同當初期望差好遠，成件事本來係一套勵志片，但從來未睇過一套勵志片，最後係失敗，有少少唔甘心。」
去年約滿港視後，艾威加入失業大軍，太太又因病先後動了三次大手術，幾乎耗盡艾威積蓄。接二連三遇挫折，絕非一般人能承受，艾威說：「好多朋友支持我，發訊息鼓勵我加油。HKTV咁多同事，我相信唔少面對逆境，但個天安排所有嘢係有目的，係令你日後更加強大。」
後輩無路可行
除了一些老戲骨，港視亦捧紅了一班後輩，王宗堯有幸在開台劇之一的《選戰》做男主角，面對港視命運倒數，王宗堯悲哀又無奈：「無論TVB又好ATV又好，好多黃金檔都變咗外購劇，冇晒香港人製作，其實係好悲哀，香港班工作人員仲有乜嘢可以做？HKTV訓練班出嚟啲小朋友，一開始經歷冇發牌，又唔可以去第個電視台，可能做特約，搵幾百蚊一日，你叫佢放棄追夢？佢哋會好唔甘心。諗住肯埋頭苦幹就會做到，但無奈呢件事令到我哋好灰心，睇唔到個出路喺邊度！」
連本來寂寂無聞的音樂人陳詩慧，亦因為一手包辦作曲、填詞、主唱《選戰》插曲《I'll Be There》而受注目，提到政府不發牌，挑起了陳詩慧的怒火：「心情梗係唔好！我哋又唔係作奸犯科，又唔係反政府，我哋都係想打份工，安安樂樂搵三餐，政府都要剝削咗我呢啲機會？冇咗個電視台，又喺香港咁一台獨大環境底下，我哋點生存？真係好氣餒。」
回想當日不獲發牌噩耗，陳詩慧邊拭淚邊說：「嗰時世界係黑色，坐喺度都唔知點算……」雖然港視前景令人沮喪，但艱苦歷程卻令人成長，王宗堯說：「我變成一個可以行前啲幫手孭一啲嘢嘅人，好似係由一個男仔變成男人。」陳詩慧亦變得關心政治：「經過呢件事，我好留意政府做啲乜，我感激特首，因為佢令我發現社會上有好多不公義地方。」
場地：The AIR（The ONE）
艾威服裝：ZALORA