話咁快又開學，望到街上面學生人來人往，不時會留意校服款式，唔少學校校裙真係好靚，有時真係會掛住自己套校服。而香港最有代表性必定係長衫、格仔裙、全白裙及水手服，你又最鍾意邊套呢？
唔少人覺得天藍色長衫最端莊斯文，其窄而長剪裁，對女學生行為有一定規管作用，就如香港校服活字典的金綸校服總經理林松坡所言：「想行大步都難，端莊有規管作用。」不少名校如真光、協恩都仍以長衫為校服。
而最有殖民地色彩，必然係英國傳統嘅蘇格蘭格仔裙，取材自舊「事頭」英國的蘇格蘭高地民族服，採用花呢格紋即由數種不同色彩，以橫、直紋交錯織成花樣布料，做出靚靚百摺裙。中學如銅鑼灣聖保祿、培敦中學都用格仔裙做校服。
最受歡迎必定係水手服，曾被譽為女神校服的新法書院水手服，是由林松坡一次去日本旅行時，受啟發而引入。新法套校服可算係最正宗、最有集體回憶的水手服，而家發展至有唔同顏色如薄荷綠、粉藍。
香港最簡潔、最普遍必定係全白校服，唔少中伏女學生都憎呢套校服到極點，就如記者我自己。不但全白顯肥效果一流，大熱天時三十幾度都要加件冷衫遮肥。不過呢套簡單校服，就可以激發無限mix and match潛能。想當年，記者外加Uniqlo冷衫、agnes b.黑色三用袋、Dr. Martens返學鞋，再加對日本妹泡泡襪。校規？佢無講唔得咪即係得囉，最緊要靚嘛！
長衫、格仔裙、全白裙及水手服可謂香港最有代表性，你又最鍾意邊一套？
記者：楊麗珊
攝影：楊錦文