特區政府由鼓勵Uber變成嚴打Uber，激起唔少受過的士司機氣嘅香港人更加力撐Uber，估唔到行政會議成員羅范椒芬都暗撐Uber。噚日羅范去到兆基創意書院出席一個有關創意嘅論壇，講起佢近年專注嘅創新科技問題時就話，佢覺得香港應該用法例去令到Uber合法，事關佢好相信分享經濟、共享經濟嘅想法，而從呢一點佢都覺得Uber有好處囉。羅范貴為行會成員，好心就喺政府推動吓，等市民都可以共享喇。
跟住八方問佢有冇試過用Uber叫車，佢就話冇喎，因為佢話平時都係坐港鐵、巴士、電車為主，至於點睇前政府規劃師薛國強提議取消電車，羅范耍手唔答，然後就登上佢架私家車離開。