喺香港做傳媒，經營不易，係人都知。亞視虧本多年，俾政府取消牌照；有線電視連年虧損，全靠有大財團九龍倉嘅大樹遮蔭；無綫電視一枝獨秀，但最近宣佈中期業績，純利下跌，認真麻麻；now又如何呢？因盤數列入電盈之內，冇獨立賬目公開，好難估；至於報紙，上市公司如明報、壹傳媒、南華早報都宣佈得唔係幾好，星島集團呢？話今個財政年度中期盈利上升7.8%喎，廣告幾好喎，但純利只係有三千二百七十萬港元，全年大概有七千幾八千萬，比起1992/1993年全盛時期，差唔多少咗四至五倍，何故二十三年前星島可以憑一張報紙賺三億幾元，今天反而只係賺七八千萬？諗深一層就知道係媒體廣告收益今天遠不如昔，或經營成本大增，非獨一張報紙為然，全港報紙都係一樣，是所謂大勢所趨，無論甚麼英雄皆難敵時勢。
一個人到FCC吃午飯，碰到廣告Y，呢位高人已經在半退休狀態，掛住一兩個顧問銜頭，為舊行家服務，兼且義務為仍然在前線搏殺嘅舊下屬，間中度吓計仔。左丁山對佢講，聽聞有媒體做中期檢討後，大概因廣告收入與預算收入有偏差，全公司大舉「捽數」，由上而下，前線人員為之百上加斤，問廣告Y：「這是否個別現象呢？」廣告Y話：「係總體現象至真，個個都話唔夠數嘅啦。我嘅舊夥計，依家係Account Director，夠向我呻到樹葉落咯，佢俾CEO捽數捽到暈，自己向下屬捽數，一兩位手下同佢講：阿Sir你自己去行街跑數啦，我地冇晒計嘅嘞。我當紅嘅年代，夥計咁樣講，立即炒之哉，但現在炒人，未必搵到有經驗人士替補，又大有可能會幾個月都缺人，要自己做埋一份，舊下屬唯有展示吓佢嘅驚人EQ，一於忍忍忍！事實上，當今零售業死火，好多零售廣告都暫時冚旗，上半年業績唔得嘅話，好難靠下半年追番，只望下半年嘅預算數字唔好與現實脫晒節而已。踏入十月份，各大公司開始做2016年預算，碰正零售數字差、股市差，人心虛怯，做預算一定會係保守兼手緊，例如節流計劃就更加着緊，削減加人工幅度（或甚至唔加），叫停擴充計劃，大劈廣告支出等等，廣告公司最緊張就係呢樣。」媒體咪又緊張，如果企業削減2016年廣告預算，廣告公司與媒體會一齊喊苦，到時搶廣告會變成零和遊戲，必有傷亡。識時務者就盡快止蝕，新報宣佈唔玩，幕後股東果然醒目，但成報仍堅持負隅頑抗，唯有讚佢一句：勇氣可嘉。