【銅鑼灣】張智霖（Chilam）向來都是愛車之人，昨日又出動到銅鑼灣Bentley（賓利汽車）陳列室睇車，不過同行的不是一班汽車發燒友郭富城、沈嘉偉和余文樂，而是老婆袁詠儀（靚靚）和8歲大的囝囝張慕童（魔童），趁假日陪伴屋企人。
昨日下午3時許，記者發現Chilam一家三口與蔡一智和太太周雪芳及9歲大的囡囡蔡斐嵐現身銅鑼灣利園附近，一行六人小心翼翼過對面馬路的Bentley陳列室，Chilam和阿智帶埋兩位小朋友入內，而兩位太太則在門外等候，自顧自傾偈講電話，免進入男人天地。
汽車銷售員見到「大客仔」Chilam即上前殷勤招呼，與Chilam一齊研究各款車的外形及性能，見Chilam邊行邊點頭，好細心聆聽，看來又想買新「玩具」；至於「冇人理」的阿智顯得有點納悶，惟有幫手看住兩位小朋友，等到攰便獨自坐下來休息。
魔童嵐嵐試車
雖然Bentley陳列室內全是貴價靚車，價錢由300萬至逾千萬元不等，但魔童和嵐嵐只顧玩得開心，當正陳列室是遊樂場一樣，由一架車跑去另一架車，又輪流坐上司機位，魔童更在司機位爬過另一個坐椅，相當活躍，兩位星爸亦容許小朋友慢慢「試車」，銷售員當然不敢多言。
約半小時後，Chilam發現記者即叫店員打開側門讓他們離開；魔童面對鏡頭明顯有點怕醜，等車期間輪流攬住爸爸媽媽撒嬌，靚靚更將囝囝緊緊擁入懷中。之後兩個家庭各自乘車離開，臨走前Chilam和蔡一智亦禮貌地向記者say goodbye。
採訪、攝影﹕徐錦池