首次陀BB的梁政珏，預產期在今年11月，但她遺傳了母親子宮後屈，而且有胎盤前置及位置過低問題，又試過兩次出血，上月25日本報影到她坐輪椅入瑪麗醫院等生，但原來她住院數天就獲醫生批准返家休息。
昨日有讀者向本報報料，在剛過去的星期日（8月30日）目睹梁政珏攜夫何思源現身銅鑼灣世貿中心的無印良品，惟當日梁政珏打直行入去，卻要瞓在擔架床被救護員抬走。
讀者向本報透露，當晚下午6時多見梁政珏在世貿中心的無印良品逛街，突然見到全店工作人員變得緊張，聽到相信是店舖主管叫同事暫放低工作，職員更向一個方向急步走，讀者說：「原來有大肚婆作動要生仔，睇真啲就見到大肚婆係梁政珏，當日佢老公都喺度，但好快職員就用啲板遮住，之後就有救護人員抬走咗佢，佢有用手遮住少少臉。」
張立基大肚女友出院
本報昨日透過短訊問梁政珏周日是否在無印良品作動被送院？雖然她只回覆：「現在要專心休息，不回應了，多謝關心。」但隨又後在instagram貼了自己多個表情的新相報平安：「上次去醫院只係做檢查，今次就真係開始住院倒數等生喇，我同JohnsonBaby都OK，唔使擔心我哋！」梁政珏更留言寫道：「想多謝星期日喺世貿機警嘅security同無印良品嘅全體同事，特別係一直陪在我身邊捉住我隻手安慰我的女同事，多謝你哋保護我！」此外，張立基日前透露大肚女友入院，昨他在微博表示：「基嫂已出院，多謝各位連日來的關心。」問基嫂和BB情況？他在電話說：「冇事，有心！只係啲女人病，BB的事不想多說。」
採訪：李察
