【本報訊】股市波動，買家無懼入市。以貼近同區二手開價的新地（016）東涌東環II昨日開賣首批328伙，吸引上車客、投資者及內地客等湧入市，銷售歷時僅約10小時，全部沽出，是自房協喜漾8月初以來，第一個首批即日沽清的一手盤。新地副董事總經理雷霆表示，會盡快加推應市。
記者：黃嘉銘 陳家雄
新地東涌東環II昨日分4輪時段開賣首批328伙，早上8時45分開始第一輪，已吸引580組買家到場揀樓，現場人頭湧湧，半日內一房甚至被揀清。直到傍晚6時，新地副董事總經理雷霆表示，昨日首批328個單位全部沽清，對銷情感滿意，由於向隅客甚多，會盡快加推單位應市。今日料交代加推詳情。據悉，昨賣328伙，最後一伙可參與揀樓的籌號為483號，料甩底客150組，數量屬少。
成功需「父」幹佔多宗成交
今次新地以貼近同區二手價開盤，兼且入場費唔使四球，吸引用家、炒家及內地客入市，業界稱為「世界盤」，造就項目成為8月初房協喜漾以來，首個即日沽清的新盤。追溯近月一手盤首日銷情，查實好慘情，銷售率由41.7%至86.7%，其中以劏房、入場費低作招徠的遠展（035）黃大仙鑽嶺上月底盡推234伙，首日僅沽130伙，銷售率僅55%。
東環II買家主要由本地人撐場，仍是多宗成功需「父」幹的案件重演，亦是近日多個以劏房為主的新盤主流買家，反映仍有缺乏首期的第二代上車客仍需家庭支援。 現場買家均指樓盤呎價不用一萬元，在其他地區起碼超出此數，價位是最被吸引的重點。
昨日透過兩大代理中原地產及美聯物業認購的用家及投資者比例分別為8比2及6比4。美聯住宅部行政總裁布少明則指，該盤投資者比例較近期其他新盤高，料租金回報率可達4厘，同區呎租約37元。
另外，據代理統計所得，昨日首批東環II買家當中，約10%為內地客，與近期多個銷售新盤的內地客佔比相若。
人幣貶值 料內地買家增
根據中原地產研究部資料，本港第一季一手樓內地買家佔比約8.2%，佔金額比例13.5%，兩個數字均是25個季度新低，鑑於人民幣滙價有機會持續貶值，有發展商預期內地客為了對抗滙價下跌，來港買樓保值料增加，料未來兩季數字有回升迹象。
其他一手消息，宏基資本（2288）尖沙嘴官涌街匯萃獲大手客斥資約2,020萬元掃4伙，計劃投資收租，項目總共66伙，上周五開售，暫沽40伙。此外，香港興業（480）愉景灣項目悅堤，將7伙貨尾劃一加價5%，包括6伙為地下連1樓複式、1伙為頂層複式，下周一（7日）以先到先得形式發售。
【4大類別買家心聲】
家人有份資助
【上車客】
「儲咗3至5年錢，加上有家人資助部份首期，最後用咗500萬買東環II兩房單位，成功上車，將會支付兩成首期。希望少啲大陸人買樓，未來可增加供應，唔會用一手價錢去買二手樓。本身排4號前籌，但後面好多人等緊，有啲壓迫感，同埋揀樓時間得5分鐘，所以有啲趕。」
係被迫上梁山
【租轉買】
「𠵱家用咗7,000蚊租住荃灣劏房，今次成功用410萬買東環II，自己已經成60歲先可以同細妹（計劃九成按揭供30年）一齊買到樓……簡直係迫上梁山。香港樓價實在太貴，摸頂入市都冇辦法，唔買就冇樓住。 」
（業界指以60歲而言，一般銀行只按最多10年）
把握投資機會
【內地客】
「喺山東來港已經5年，本身做金融行業，𠵱家喺九龍站住，今次成功用咗540萬買東環II低層兩房單位，因為未有香港永久居民身份，所以要畀買家印花稅。我覺得香港樓價高，不過受近排市況影響，所以估樓價之後會跌，今次買呢個樓盤係一個投資機會，暫時未決定自住定係收租。」
睇好樓市前景
【投資客】
「入咗兩張票，成功抽到27號籌，買咗467呎兩房中層單位，打算用嚟投資，估計可租到2萬以上，其實中籤係好難，抗戰勝利日成功抽到樓盤，好似中咗六合彩咁開心。不擔心摸頂，睇好香港樓市，本身都有投資工商物業，覺得東環II呎價九千幾，即使今次買樓要畀DSD都唔係問題。」
