東驥基金董事總經理龐寶林嘅寶貝女龐卓欣（Ada）成為今屆港姐亞軍，龐寶林可以話成為星爸，感覺應該幾爽，不過佢話星爸其實唔易做，壓力比講股票、做投資更加大，好怕講錯說話會影響到阿女。
龐寶林話，平時評論股市，講中嘅就好，講唔中最多都係承認自己睇錯，反而𠵱家唔敢隨便講阿女嘅嘢，擔心講錯咗，影響到佢，「壓力肯定大過投資股票」。
佢舉例話，Ada最初參選，有人問佢做邊行，由於當時未入圍，所以佢唔敢講太多，結果被傳媒形容佢為寸嘴Ada，佢至今依然替阿女感到不值，其實成件事只係大家一場誤會。
Ada𠵱家跟父母一齊住喺何文田，龐寶林認為，阿女要有多啲湯水，暫時應該唔會因為港姐工作而搬開住。不過佢大呻，𠵱家見阿女嘅時間少咗好多！