天津大爆炸已經發生咗接近一個月，雖然官方好似已經當冇咗件事咁，但相信住喺天津嘅市民都仲猶有餘悸。日前喺天津球壇有個重磅消息，中甲球隊天津松江將會使成千萬歐元，邀請前巴西國家隊教練、幾日前先畀巴甲高士路炒魷嘅盧森貝高領軍，仲傳話盧帥會瞄準啲巴西猛將加盟，包括前國家隊前鋒柏圖喎。不過盧森貝高同柏圖個底都麻麻哋，天津松江一心想爭取升班中超，唔知會唔會反而係捉兩隻老鼠入米缸呢？
袋7千萬出年先上任
中超球隊財雄勢大，大部份都有錢請到國外名帥嚟執教，16隊波裏面得六隊係由土炮教練領軍。好似廣州恒大、富力同上海上港更加有實力請到史高拉利、史杜高域同艾歷臣呢啲有級數嘅教頭。
前港腳吳偉超效力緊嘅天津松江，𠵱家喺中甲排喺中下游位置，要衝中超難度都幾大，估唔到班主心頭咁高，球會董事長束昱輝喺周三晚透露，會請盧森貝高嚟接任，總使費要成1,000萬歐元，即係7,000幾萬人仔。據講盧森貝高會喺2016年先正式上任，仲會帶埋九人團隊一齊嚟。
62歲嘅盧森貝高執教經驗超過30年，喺1998至2000年做過巴西國家隊主帥。經驗係豐富，不過近年佢喺每隊都教唔長，今年六月先接手執教高士路，但隊波戰績完全唔掂，喺幾日前已經畀人炒咗。戰績冇保證，更令我求大俠質疑嘅係呢位仁兄操守有啲問題，佢喺三年前被判提交假文件罪成，但只係罰錢同判社會服務令了事；喺03年又因為逃稅被判入獄五年，但上訴後又唔使坐。亦都有未經證實消息，傳過佢有涉及洗黑錢活動，天津松江搵佢，真係祝佢哋好運。
引進同鄉柏圖加盟
盧森貝高上任後，球會亦會全力支持佢收購猛將，據報前者將會引進前巴西國家隊前鋒柏圖。柏圖喺06年出道嗰陣被譽為巴西神童，但越踢越霉，2013年回流巴甲，表現都係一般，最令人深刻印象都係效力AC米蘭嗰陣同主席貝盧斯科尼個女芭芭拉拍拖，要佢肯降格嚟一支中甲球隊，唔知松江球會老闆有冇囡囡介紹畀柏圖識，作為吸引佢加盟嘅賣點呢？
