近日壞消息纏身嘅小米，有好消息沖喜？有美媒披露，小米計劃進軍韓國，向Samsung、LG等等韓國品牌挑機，諗住用低價手機打破當地韓國機壟斷市場嘅局面。
一向瞄準發展國家嘅小米，𠵱家嘅市場有印度、馬來西亞等等，近日仲有傳小米會打入非洲，絕少會選址好似韓國呢類發達國家。
不過，聽聞𠵱家韓國有唔少公司以「小米韓國分公司」名義招聘同宣傳，令到小米好頭痕，所以小米之前都試過喺「小米打假」官方微博做過公告，澄清公司冇進軍韓國，所以唔知呢次話小米進軍韓國嘅消息係堅定流嘞。
之所以話小米近日壞消息纏身，主要係因為佢哋最新發佈嘅紅米NOTE2被指做虛假宣傳，用國產貨充當配件，出現大規模退貨潮，唔知主席雷軍幾時出嚟親身解畫呢？