如果以下睇到大家毛管戙，八方覺得呢批北上賺人仔嘅香港藝人，成功咗嘞。話說唔少藝人噚日爭相喺微博洗版唱好閱兵，去年雨傘運動轉貼反對文章嘅鍾鎮濤，留言話睇閱兵聽到國歌時，「唱一半就哽咽了，熱淚盈眶唱不下去，祖國萬歲！」內地網友當然激讚，但有網就大鬧好擦鞋。
關之琳高叫祖國萬歲
其實李克勤、張智霖、丁子高、梁烈唯同王祖藍等都紛紛貼上致敬手勢相；惠州市政協委員陳小春則用簡體字寫：「向所有在反法西斯戰爭中為民族解放而英勇奮戰過的，犧牲了的和倖存的前輩，致敬！」就連平日甚少喺社交網出現嘅大美人關之琳都留言：「祖國萬歲萬歲萬萬歲！」
最令人眼突一定數吳孟達，佢激動到一度以黨員自居，喺微博高呼：「我驕傲，我是中國人！我自豪，我是中共黨員！」引嚟網友質疑後就澄清並致歉：「我不是中共黨員，由於比較激動，引用他人話語時忘記加引號。」人仔唔易賺，搵食認真艱難。