到此一遊喺facebook打卡，是常識吧？所以北上嘅特區閱兵觀禮團成員，噚日一到天安門廣場，包括新聞統籌專員馮煒光、民建聯陳克勤同經民聯梁美芬等，成朝忙於喺fb貼相。咦，乜內地用到fb嘅咩？唔少網民質疑，佢哋竟然咁沙膽，喺天安門城樓公然犯法「翻牆」上fb？
平時經常喺fb做鍵盤戰士嘅馮煒光，一到場就不斷貼相展示閱兵現場盛況，仲留言：「大閱兵即將開始。上網、上FB冇問題。」似乎佢都做咗一輪如何上網嘅測試。陳克勤都唔執輸，貼咗喺天安門前嘅獨照、以及同黨友何俊賢及周浩鼎嘅合照，打卡之餘佢仲自動報到：「習主席，克強總理，唔駛（使）打電話啦，我到左（咗）。」
網民：勾結外國勢力
梁美芬都好活躍，喺fb詳述自己同「一些老朋友拍照」，更加成功「捕獲」三位特首夫人，包括梁振英夫人唐青儀、前特首曾蔭權夫人鮑笑薇同埋澳門特首崔世安夫人霍慧芬。「四美圖」一出，政界紛紛look，話從曾太嘅笑容，睇得出捲入官非嘅煲呔是禍是福。
但喺佢哋開心share之際，唔少網民揶揄佢哋翻牆fb，公然違反國家法規，又有人話用fb唔用微博係勾結外國勢力。但有網民都為佢哋講公道話，話買「一卡兩號」嘅跨境數據卡喺內地上網，其實唔翻牆都上到fb，有網民又笑，建制派咁多「神級」fb管理員，可能佢哋係傳畀助理，越洋貼相呢？點估到貼貼吓變咗出洋相。
識睇睇留言
Hoi Yat Tsoi：翻牆都算係新聞咩？𠵱家想翻人人都可以翻啦！
Keith Lau：全部都有神級管理員㗎喇，email張相番香港再post fb咪得囉。
bill lam：買香港中國聯通或移動一卡通就可以直接上facebook，可以唔使翻牆㗎啦。
Dart Lee：咁斗膽用fb，小心當場炮決呀！
HK Christine：政治不正確，又搵外國勢力，應該用wechat!!
Kenneth Ng：又係另一班豬一般嘅隊友，𠵱家大陸冇社交網咩，點解要po喺fb度！
資料來源：《蘋果》網頁
李八方
mailto:[email protected]