Apple Watch都威咗好一輪，Samsung趁住剛推出Galaxy Note 5同Galaxy S6 Edge+之勢，剛剛又在其官網發佈新的穿戴式智能裝置－－ Gear S2。論外形，機身採用圓形錶面，極具手錶味道，唔似早幾代的科幻設計，感覺易入屋好多。機身屏幕使用了小號的1.2吋設計，再配以360 x 360解析度，感覺以實用性為主導，我反而覺得幾討好。其他硬件規格還包括1GHz雙核心處理器，配以可直接作付款服務的NFC模組，香港用唔用到，暫時是未知之數。個人較喜歡機身內置eSIM插槽，可以直接當手機聯通3G網絡，這一點有辣有唔辣啦！
此錶的一大亮點，是有類似Apple Watch的普通版及Sport版設計，Sport錶面設計比較簡單，有點點「無印」感覺；Classic版則有一個類似潛水錶的凹凸邊框設計，感覺錶味更濃，如果再配皮錶帶，相信對一般上班族都會甚討好。
至於智能手錶的操控都頗具特色，首先是錶側有Home及Back掣，再加上錶面有一圓形邊框，以左右旋動作選項之用。Touch Screen功能當然一樣落齊，估計圓形邊框是用作輸入文字所用，不過整體外形，個人覺得與某韓國品牌的智能手錶有幾分相近。
暫看智能手錶有心跳計算、跑步距離、天氣預報、錄音、日程、打電話及接收訊息等功能，不過由於它是行Tizen，所以出錶後要再加Apps都冇問題。
記者：朱崇德