前日上京準備參與閱兵嘅煲呔兩公婆，就算俾記者問驚唔驚「落鑊」都笑騎騎，觀乎煲呔此行所獲嘅禮遇，包括獲負責香港事務嘅官員握手，似乎都有啲啟示。
話說噚日朝早閱兵儀式結束後，國家主席習近平喺人民大會堂2樓宴會廳筵開112席招待中外來賓，有成900人出席，香港特首梁振英、前特首曾蔭權同港澳辦主任王光亞都係同枱。
CY同枱冇交流
鏡頭所見，煲呔同CY冇乜交流，王光亞就喺坐低之前，主動走埋煲呔身邊握手，兩個人仲傾咗一陣，雙方都笑容滿面。反而坐正王光亞對面嘅CY，兩個人喺鏡頭之前，都係冇乜交流！
除咗「王握手」，連坐喺另一枱嘅國家副主席、港澳工作協調小組組長李源潮，都有特登走去同煲呔握吓手傾吓偈。唔知一心想煲呔「落鑊」嘅人，睇到呢兩幕，到底有乜感覺？