近期股市波動，唔少股民嚇到個心都離一離，連舊年搵錢多過老手索羅斯嘅新晉對沖鱷王都不能倖免，今年做咗等於白做！
舊年打入二十大最賺錢對沖基金經理排行榜、48歲嘅艾克曼（William Ackman），佢旗下基金Pershing Square喺8月嘅全球市場動盪中都走唔甩，回報重挫9.2%，令今年頭7個月嘅升幅全數蒸發，總收益倒跌0.1%。睇番呢個基金舊年認真威水，回報高達40%，遠遠跑贏同期僅升14%嘅標普500指數。
艾克曼上星期已經以書面向客戶耍冧，坦承市況動盪令回報全數蒸發。
除咗艾克曼，其他較為出名嘅對沖基金經理上月都冇啖好食。好似經常向蘋果管理層獻計嘅埃因霍恩（David Einhorn）旗下基金就跌咗5.3%，全年計累跌14%。