迪基亞轉會事件最終好似鬧劇情節咁收場，呢位西班牙門將過唔成皇家馬德里，至少未來半季都要踎喺曼聯度，有消息指呢單嘢再嚟反高潮，紅魔又向迪基亞再提續約，應承畀返正選位佢，亦喺歐聯參賽名單度預埋佢。
曼聯賣唔成迪基亞，係紅魔定皇馬嘅問題已經唔重要，難得最聯仲可以拎出誠意，喺提交畀歐洲足協嘅歐聯名單上預埋迪基亞，仲再同佢傾續約。冇嘅，睇咗新門將羅美路喺頭幾場波嘅表現，雲高爾睇怕都唔敢仲企硬，希望可以用返穩陣好多嘅迪基亞。至於失寵嘅域陀華迪斯，就冇被列入名單。
「A高」落選勢被棄用
其他出戰今屆歐聯嘅球隊都已經提交咗名單，由於按規定25人名單裏面一定要佔至少八個「本土訓練球員」，所以車路士無奈冇將喺轉會窗關閉前簽嘅守將迪積洛保積剔出名單；至於意甲嘅羅馬就冇同「A高」艾殊利高爾報名，但原因相信係佢喺球會已冇運行將被棄用。