【本報訊】香港球迷到深圳撐港隊，除一票難求，過關受截查，球場內更受嚴密保安監視，但無損球迷士氣，不停吶喊「We are Hong Kong」，門將葉鴻輝救出多個險球，力保不失完場，球迷盛讚港隊力抗強敵中國隊，「和波當贏」。
完場後港隊球員走到港人觀眾席前鞠躬，球迷也回拜。賽前球迷普遍承認中國隊實力較強，港隊打定輸數，但香港人一定撐港隊。結果港隊在中國隊力壓下，苦戰打和獲一分。球迷都喜出望外，紛紛歡呼「和波當贏」，盛讚港隊鬥志強頑。
場內遭保安嚴密監視
球迷群組「香港力量」組團到深圳，但入場時橫額全被沒收，成員進場後卻發現中國球迷帶大橫額未被阻撓。深圳寶安體育場內港人觀眾席幾乎滿座，不少港人穿上港隊球衣，兩旁有大批公安站崗。有兩名保安在跑道上對正香港區以手提攝錄機拍攝。球迷阿Yan對身邊有大量保安稍有微言：「睇得冇咁自在。」開場播國歌時，香港球迷保持沉默，無發噓聲。
「香港力量」亦在網上號召無法北上的球迷到旺角一間cafe睇波，逾60名球迷到場。有球迷不滿無綫直播只見到中國球迷打氣片段，香港球迷「被消失」。現場氣氛熱烈，完場打和時，全部人興奮得有如贏波，不斷唱歌跳舞慶祝。
■記者麥志榮、佘錦洪、潘柏林
港球迷心聲
陳同學：「和波當贏啦！打得最好係葉鴻輝，救咗唔少必入球，香港隊勁啊！」
阿勇：「一球都冇失到，搶到一分，完全係超水準表現，當贏咗㗎啦！」
