身兼中央政策組諮詢委員、「支持十大院長聲明校友組」發言人彭泓基（圖），前晚喺港大畢業生議會特別大會，用英文問台下校友知唔知校友組有幾多授權票（sheets），不過，英語專家詹德隆詹Sir一上台就笑彭博士讀音有誤，「sheet」、「shit」不分，彭博士梗係嬲豬啦！
噚日議會公佈投票結果，彭博士似乎唔太上心，反而對「屎票不分」嘅指控更在意，話心中有屎嘅人自然容易將兩者混淆，佢翻聽錄音都覺得自己冇讀錯，認定係政客污衊對手。佢仲話「如果心存怨恨同恐懼，睇乜嘢都覺得係陰謀論」，不過又認定今次係不敵政黨動員能力，相信對方好多人唔明投緊乜。呢番言論似乎有啲矛盾喎。