今時今日新聞越追越快，體育新聞都唔例外，好似NBA比賽完半場嗰陣，或者第4節開打前，電視台都會訪問吓教練，有啲教練仲要帶咪喺身收音；南美足球聯賽仲誇張到有球員入波，場邊主播就會即時拎個咪訪問佢。今年美國網球公開賽都開創潮流，《ESPN》電視台主播會喺完成單盤休息期間訪問球員，但費達拿同祖高域等一線球星就大叫怕怕。 （now676台今日7:15am直播）
雲迪維姬：唔記得答咗咩
周一美網女單第一圈，雲迪維姬對史堤芬絲合演全美對碰，戲碼唔算強，但就出現有趣場面。當雲迪維姬以6:4贏第一盤後返場邊休息，ESPN女主播舒拉維就拎個咪訪問佢，雖然問題唔算好特別，都係問佢第一盤打得滿唔滿意、點樣可以贏埋第二盤等，但喺網球界都算最新鮮。最終雲迪維姬以6:3贏埋第二盤晉級，佢賽後就憶述番受訪情況：「女主播有問我接唔接受訪問，我就點頭示意OK；不過，其實當時我都集中緊精神比賽，唔係好記得自己答咗咩。」
講真，足球、籃球比賽半場休息時間多啲，球員接受訪問都方便啲，但網球盤與盤之間小休得嗰兩分鐘，坐低飲啖水、抹吓汗都幾乎要起身，仲要接受訪問就真係攞嚟搞。好似周一首圈贏波晉級嘅男單一哥祖高域就話：「我知道佢哋想學NBA。球員更衣室都討論緊呢件事，但起碼喺今屆賽事，我唔會接受比賽期間訪問。」周二以6:1、6:2及6:2淘汰美亞嘅瑞士天王費達拿賽後亦都話：「如果係表演賽，我會接受盤與盤之間訪問，但真正比賽，仲要係大滿貫，我就唔會接受啦；而且我都好懷疑有幾多球手會接受訪問。」
「記者」禾琪追問伊斯拿
球員唔多鍾意比賽期間受訪，但又唔代表佢哋唔鍾意訪問人喎。女單四號種籽、丹麥甜心禾絲妮雅琪，周二以6:2、6:0輕取美國大學（NCAA）冠軍洛布過關；可能輕鬆得滯，佢完場後就留喺記者室，仲扮晒記者咁向美國男球手伊斯拿發問㖭。