多得偉大嘅梁特首努力擦鞋，今日無端端多咗日假期。不過，對「生於斯，長於斯」嘅小弟，香港只有重光紀念日，甚麼抗戰勝利又同香港有甚麼關係，而且要慶祝都輪唔到共產黨吧。當然，論面皮之厚，深圳河以北認咗第二，全球應該冇第二個國家敢認第一；隔籬版老友杜秋棠，最近就寫咗篇文關於中共打飛機式電影《百團大戰》，小弟未睇過，真係判斷唔到套戲好唔好睇。不過，無恥地「偷票房」，明明一日全國得10%戲院上映，竟然收入40%票房，結果兩日就突破一億人仔，真係人唔笑狗都吠。
坦白講，打飛機式電影又唔會係中國獨有，最近就喺收費電視台睇咗套南韓拍攝嘅電影《鳴梁海戰》，內容係15世紀日韓一場關鍵大海戰，朝鮮大將李舜臣點樣靠天時地利，只靠十幾隻爛鬼小戰船，打贏豐臣秀吉幾百艘龐大海軍，避免朝鮮滅國。從古到今，唔少戰爭都係以弱勝強──中國人無人不識「赤壁之戰」，西班牙無敵艦隊亦俾英國打垮等。
球場上以弱勝強例子，更加比比皆是。啱啱英超，車路士同曼聯嘅班費，不知是水晶宮同史雲斯多少倍，結果都輸得難睇；今年美洲盃八強，就有巴拉圭淘汰巴西。今晚中國主場對香港，賽前無論用世界排名、實力、身價等數據分析，似乎都傾向中國，但香港人要爭氣，最重要堅持，特別唔可以失去拼搏精神。今場波無論勝負，希望香港一班球員能夠踢出冇令自己後悔嘅比賽。
文：牽牛